Act 18 | MED | STEP | Wote ei kᵾn, Pol Atins kona ei, wak ropa, Korin kona ila purum.

Acts 18

Pol Korin Kona Ila Purum

1 Wote ei kᵾn, Pol Atins kona ei, wak ropa, Korin kona ila purum. 2 Kona ila mba, Pontas kona ila, metᵾng Jura wu ti, mbi tek, Akuila nᵾtᵾng ei, kandpa titim. Wu ei kᵾn, ambᵾm Prisila raⱡ, Itali kona ei, wak rokᵾⱡ orᵾnggil. Ei nambuⱡ emel, Rom kona ila gapman wu nuim Klautiyas ndi, Jura wamp, Rom kona ila petᵾng mbᵾ ok, ekit pᵾi nitim. Wote Pol mba, wamp raⱡ kandpa tᵾpa, wamp raⱡ, wote elim kongun etᵾm ei mel, kng kau kᵾng mim etmbil kona ila, tᵾpa rapundpa etpa murum. 4 Moⱡpa, mowi kor nimbᵾ kᵾn, Jura wamp nga atinga manga mbila, Jura wamp na, Grik wamp na mbᵾ nga mondpa pili orunga, ropa rut ndupa, ik mbo inditim.

5 Wote, Sailas kᵾn Timoti raⱡ, Masaroniya kona ei, wak rokᵾⱡ orᵾnggil. Ni kᵾn, Pol ndi, rumbᵾⱡ ant ui mbila rᵾk rᵾk, Got nga Rᵾnang ik kai ei, nimba para ndurum. Para ndupa, nimba mel, Jisas ni, wu Mesaiya ei nga Rᵾnang Ik Kai ei, ronduⱡ mundpa nitim. 6 Ei kᵾn, Pol nga ik nitim nimbᵾ, akᵾk, ik mbuldung orunga nᵾndᵾk elingina, Pol ndi, wamp elim nga muⱡ mbal mbᵾ, ndanda ndupa, nimba mel, “Enim Got kᵾn, kan puⱡa rong ndam, na nga ⱡawa ti mon. En enim nga ⱡawa ei! Na nga ik ti ila, pi napᵾtᵾm. Akup ya ei kᵾn, na wamp rᵾⱡaip elpa kᵾⱡ kᵾn mbi!” nitim.

7 Wote, Pol atinga manga kel ei, wak ropa, mbo wu Taitas Jastas ni ti ei, Got nga mbi paka rondpa itim ei nga mang kona purum. Wu ei nga manga ei, Jura wamp kᵾⱡ nga atinga manga kel morum ila, nundpa anggᵾtᵾm. 8 Ni kᵾn, Krispas ni wu ei, Jura wamp kᵾⱡ nga atinga manga kel ila rᵾp wu ei murum. Wu ei, elim nga manga tenda ila mondpa pili wamp mbᵾ kᵾn, wote Korin kona ila wamp minal kᵾn, Pol nga ik nitim ei, mondᵾk pilik, wote nu tᵾtᵾng.

9 Rumbᵾⱡ ti kᵾn, Pol mong mel kᵾndrum ei, Nuim ei ndi, elim kundpa, nimba mel, “Nim mundmong etkᵾn, ik ei nᵾn ei nga, keta mᵾn kᵾn, muⱡi nᵾmbᵾⱡi! Ik ei tᵾkᵾn, pena ila, ik nᵾn mbᵾ mel ni, wak rui nᵾri! Ei nambuⱡ emel, na nim kᵾn muⱡimp! Wamp ti ndi, nim rui narᵾmba. Ei nambuⱡ emel, ya kona peng ila wamp minal, na nga wamp mormin,” nitim. 11 Ni kᵾn, Pol Korin kona ila wamp mbᵾ, Got nga ik mbo endpa moⱡnga, pana ti, wote kalimp 6 omba purum.

12 Wote, wu Galiyo ni, Rom (gapman) ndi, nokundrum mᵾi Akeiya ila wu nuim murum. Ni kᵾn, Jura wamp mbᵾ ok, mou rok, Pol ni, imp molk mek puk, kot endᵾk, nᵾk mel, “Wu ei ndi, Got nga mbi paka rundᵾmᵾn nimba, mi ik petᵾm ei mel, pep rui narᵾpa, ik ti mel ku mbo endnᵾm,” nᵾtᵾng. 14 Ni kᵾn, Pol ik nimp nimba elinga, wu Galiyo ndi, Jura wamp nimbᵾ, kundpa nimba mel, “Wu ei, uⱡ kit mat etpa, Rom kona ei nga mi ik ti ropa, puⱡa ropa elinga ndam, enim Jura wamp mbᵾ nga, ik ei kum telᵾmba. 15 Ei nga wote, ya ik penim uⱡ ei, enim nga ik ei kᵾn, mbi ei kᵾn, wote en enim nga ik petᵾm kᵾⱡ nga nᵾnmᵾn kant ei kᵾn, int mana, en enim nᵾk kun itᵾi! Na uⱡ mbᵾ nga kᵾmp timp mel, kapⱡa mon!” nitim. 16 Ei mel nimba kᵾn, wamp mbᵾ, kot kona ila makrᵾpa tᵾpa, pena ndurum. 17 I nilinga, popᵾⱡ kulk, wamp mbᵾ ndi, Jura wamp kᵾⱡ nga atinga manga ei nga rᵾp wu Sostinis ni, atinga manga keta ila imp molk, tᵾk mek puk, kot kona ila, tᵾmbᵾⱡ ndi rorung. Uⱡ etᵾng nimbᵾ, wote wu Galiyo ndi, kandpa kui etpa, ik ti ni nᵾndᵾtᵾm.

Pol, Andiyok Kona Ila Int Purum

18 Pol Korin kona ila moⱡnga, rumbᵾⱡ ou ndupa mel, omba purum. Wote, Korin kona ila mondpa pili wamp ᵾngᵾnᵾl nimbᵾ, wak ropa, Siriya kona ila mbi nimba elinga, Prisila kᵾn Akuila raⱡ rᵾp rok, nu sip ila purung. Nu sip ila oⱡa pi nᵾpi kᵾn, Senkreya kona ila moⱡpa, elim nga peng ndi pek rurum. Ei nambuⱡ emel, elim Got kᵾn uⱡ ti itimp nimba, ronduⱡ mondrum ei nga itim. 19 Wote, Episis kona ila ruk puⱡᵾngina, Pol ndi, Prisila kᵾn Akuila raⱡ, kona ila wak rurum. Elim ni, Jura wamp mbᵾ nga atinga manga ᵾnggᵾtᵾm kona ila mba, Jura wamp mbᵾ kᵾn, ik nitim. 20 Wamp mbᵾ ndi, Pol en enim kᵾn, ui mat ou ndupa muⱡamin nᵾk waldᵾtᵾng. Ei wote, Pol ndi, elim kapⱡa muⱡi nᵾmbᵾⱡimp nitim. 21 Wote, mba etpa wamp mbᵾ, rawe etpa nimba mel, “Enim nᵾnmᵾn ei mel, Got ndi, kapⱡa nimba pilim ndam, wote na enim kᵾn yant uimp,” nitim. I nimba kᵾn, Episis kona ila wak ropa, nu sip tᵾpa purum. 22 Wote, Sesariya kona ila ruk mba kᵾn, Jerusa-lem mba, Got nga rapa tenda wamp kᵾⱡ, ik rungᵾndᵾpa pendpa, wote Andiyok kona ila purum. 23 Wote ni kᵾn, ant ui mat ou ndupa, Andiyok kona ila moⱡpa, tᵾpa mundpa, wote wak ropa, Galesiya kᵾn Pergiya kona raⱡ nga ruk tetᵾm kona mbila andpa, mondpa pili wamp mbᵾ, ronduⱡ ngumba, Jisas nga ik ei, kundpa nitim.

Wu Apolus Ni, Episis kᵾn Korin Kona Raⱡ Ila, Got Nga Ik Mbᵾ Nitim.

24 Ei kᵾn, Aliksendriya kona ila, Jura wu ti metᵾng ei, mbi tek, Apolus nᵾtᵾng ni, Episis kona ila urum. Wu ei, Got nga timan ik, unt nga mbᵾ, pilpa kitim. Wote ik mbᵾ, pilpa kongundpa ku nitim. 25 Wu ei, Nuim ei nga uⱡ mbila, unt ambulk pilik, mbo rondrung ei nga ronduⱡ ei, tepa moⱡpa, Jisas nga itim uⱡ mbᵾ kᵾn, wamp mbᵾ mbo inditim. Wote, el elim Jon ndi, wamp nu tindpa itim uⱡ mbᵾ nga timan ei, mendpᵾⱡ pitim. 26 Wote, atinga manga kel ila wamp mbᵾ nga mundmong iti natᵾpa, ronduⱡ mundpa ik nitim. Ei kᵾn, Prisila kᵾn Akuila raⱡ ndi, wu ei nga nitim ik ni pilkᵾⱡ, wu ei, tᵾkᵾⱡ mekᵾⱡ, en enmbil nga mang kona pukᵾⱡ, Got nga ik mbo endᵾmba ei mel nᵾk, kun etᵾk ngurᵾnggil.

27 Wote, wu Apolus ni, Akeiya kona ila mbi nilinga, Episis kona ila mondpa pili wamp nimbᵾ ndi, tᵾk rapᵾndᵾk, mon ti rok, Akeiya kona mondpa pili wamp ᵾngᵾnᵾl kᵾⱡ ngᵾk, Apolus rawe etᵾk, teing nᵾtᵾng. Wote, Akeiya kona ila ruk mba, ik mbo enduⱡnga, Got nga wamp poⱡ ti uⱡ ila, wamp minal, Got kᵾn mondᵾk pᵾtᵾng. 28 Jura wamp mbᵾ nga ik polk nᵾtmin mbᵾ, wamp mbᵾ nga kuimp keta ila, ⱡawa etmin nitim. Elim ndi, Got nga Rᵾnang Ik Kai ei ndi, Jisas ei, wu Mesaiya nᵾtᵾm ei mel nimba, tᵾpa ora ndupa itim.